Die Funkerei is a feine Såch,
nur hab i mir letztens doch gedåcht,
Funken allan is a bissi fad,
wie warads wånn i wieder mål wås Bastln tat.

A Empfänger soll es diesmål wern,
Zum Senden QRP , åber fein zum Hörn.
I waas sowås baut man nit gråd auf die Schnelle,
an Empfänger für die kurze Welle.

Die Signale kumman durch den Etha gråd,
und huckn sich auf den Antennendråht,
Nåch der Antenne wirds des erste Mål dånn eng,
man will hintn jå nit ålle Wellen segn.

A Båndfilter steht då wi a Bam,
und schaut sich die Signale ån.
Gwisse låsste er eine – fein!
Zu de ånderen såg er "Du kummscht då nit rein"

Die 40 und die 20 Meter Lången, werden då glei eingefången.
Sooo långe Wellen?? då mecht man glaben an an Scherz,
...Ah! såg ma lieber 7 und 14 Megahertz.

Hinter dem Båndfilter, des håb i gwusst,
San die Signale noch a bissl schwåch auf erna Brust.
Deshålb gånz frisch ans Werk -
mit an Verstärker wird då vorverstärkt.

Auf der Seiten måcht also dånn,
ein Oszillator wås er hålt so kånn.
Er schwingt umadum ganz froh und frei,
den brauch ma noch....für die Frequenzeinstellerei.

Jetzt müsst ma noch die zwa Frequenzen,
zåmmenbringen damit sie sich ergänzen.
I denk lång noch – då kummt da Geistesblitza,
und ruf laut " Des måch i mit an Mixer"!

Die Frau håts gehört und i hör sie sågen:
"Da Mixer is im Kuchlkastl – ganz obn"
Na na, mit so an Mixer geht des nit,
ausserdem bin I in der Kuchl nit so fit.

Stattdessn håb i a påår Diodn gfundn,
und mit dem Lötkoben zu am Ring verbunden,
Tuat man då die Signale eineschickn,
werden sie sich gånz schnell verquickn.
Und außer kumman tuat – ka Wunder,
a richtiger Frequenznplunda.

Ich denk mir glei - o wås für Graus!
Wenn ålle zgleich redn kennt sich jå kaner aus.
Wie daham – gleiche Spiel
Fein wärs, nur des zu hören, was man gråd hören will.

Der Ausweg aus dem Malheur,
es muaß hålt wieder a Filter her.
I muaß wohl wieder laut gredet håbn,
und mi selber nåch an Filter frågn.
im Wohnzimmer hör i die Frau glei sågn:
"Die Filter san unter der Kaffeemaschin -in da großn Lådn".

Quarze san gånz schene Stan.
Selten a Berg, wo kane zu finden san.
In de Stana drinnen, und oben auf -
a in der Elektronik findet man sie zu hauf.

Gibt man Strom drauf, werden se hektisch,
druckt man drauf, san se elektrisch.
Aber haklig san se schon de Dinger!
Nit mit jeder Frequenz, schwingt der Schwinger.
Nur mit ganz Besonderen tuat er nit hetzn,
und sich in Reihen- und Serienschwingerei versetzn.

Tuan sich aber a påår Quarze zåmmen -
mit Kondensatoren zammengehången -
dann bleiben nur wenige Frequenzen über,
kane drunter, und a nit drüber.
Dazwischen is a Frequenz gråd übergeblieben.
Mit dera Zwischenfrequenz låsst sich nun weiterspielen.

Aber es zum narrisch wern!
so a hohe Frequenz kann I nit hörn.
Då hilft nix, då muas i trixn,
und de Frequenz mit an Mischer weiter obamixn.

Des geht gånz flott, då gibts nix zum Fluchn,
den Mixer brauch i jå nimmer suachn.
I waß jo wo er zan finden - is der Quastl -
In der Kuchl oben - im Kuchlkastl.

Diesmal håb i a Trio gebaut,
an Oszillator, an Mixer und an Quarz zåmmengschraubt.
Då drinnen werd schwungen, gfiltert und gemixt.
und die Frequenz fein obagsetzt.

Zum Hören is des noch viel zu leise.
A Verstärker måcht auf besondre Weise,
des Leise laut - und im Gegentakt,
gfreit sich auch der Lautsprecher, der freundlich knackt.

Im Gehäuse in ana Eckn,
tuat sich noch a Minicomputer versteckn.
Der misst und schreibt und tuat dort schålten,
er håt de gånzen Relais jå zu verwåltn.
Das die LEDs leuchten, und die Frequenz a stimmt,
dafür ist des Ding bestimmt.

Jetzt schålt ma ein, es is soweit!
Und i håb mi sakrisch gfreit.
da Ton kummt außa und laut als wiiii
hör i des erste tiiitidiiidit tiiitiiitidiii.

Då gibts ka Zaudern, ka Zeit mehr zu vertreiben!
I will drauf die Antwort nit lång schuldig bleiben.
Übereifrig und kurzentschlossen,
schnell die Tastn zuawegschlossn.
Die Stehwelle noch getscheckt,
damit die Endstufen ma nit verreckt.

Aber i kånn morsn wie i will.
Das Ding bleibt stumm - fåst grabesstill.
Es hilft nix - då kånn i gebn - kurz und länger,
noch gibts kan Sender - nur den Empfänger.

Aber der is schon beim Fertigwern.
Båld kann i senden – nit lei hörn.
Und welche Antwort aus dem Kastl außakumman is -
Såg i Euch wenn der Sender a fertig is.

73 de Harald, OE8FBF